ЭРХ ЗҮЙ

Сургуулийн өмнөх болон ерөнхий боловсролын тухай хууль

5.2.Ерөнхий боловсролын сургуулийн хичээлийн жил нь 09 дүгээр сарын 01-ний өдрөөс дараа оны 06 дугаар сарын 15-ны өдрийг хүртэл үргэлжилнэ.

5.3.Ерөнхий боловсролын сургуулийн суралцагч хичээлийн жилийн хугацаанд 170-185 хоног хичээллэнэ.

5.4.Ерөнхий боловсролын сургуулийн долоо хоногт хичээллэх цагийн тоо, ээлжит хичээлийн үргэлжлэх болон суралцагчийн амралтын хугацааг боловсролын асуудал эрхэлсэн Засгийн газрын гишүүн тогтооно.

 

СУДАЛГАА, ТООЦООЛОЛ

OECD-ийн гишүүн орнуудын хичээлийн жилийн бүтэц, улирлын тоо, улирлын болон зуны амралтын хугацааг шинжилж, өөрийн орныхтой харьцуулав.

Улс орнуудын хичээлийн жил дэх улирлын тоо: 19.4% нь 3 улиралтай, 33.3% нь 4 улиралтай, 38.9% нь 5 улиралтай, 8.3% нь 6 улиралтай.

Улс орнуудын улирлын амралтын хугацаа: 16.7% нь 2-3 долоо хоног, 27.8% нь 3-4 долоо хоног, 27.8% нь 4-5 долоо хоног, 16.7% нь 5-6 долоо хоног, 11.1% нь 6-8 долоо хоног

Улс орнуудын зуны амралтын хугацаа: 22.2% нь 4-6 долоо хоног, 33.3% нь 7-9 долоо хоног, 28.9% нь 10-12 долоо хоног, 5.6% нь 13 ба түүнээс долоо хоног

Бага боловсролын түвшинд манай улсын хичээллэх өдрийн тоо 32 долоо хоног буюу 160 өдөр байгаа нь хамгийн бага үзүүлэлт юм. OECD-ийн гишүүн орнуудын дундаж үзүүлэлт 186 өдөр байдаг байна.

Харин суурь боловсролын түвшинд манай улс 33 долоо хоног буюу 165 өдөр, OECD-ийн гишүүн орнуудын дундаж үзүүлэлт 184 өдөр, бүрэн дунд боловсролын түвшинд манай улс 34 долоо хоног буюу 170 өдөр байгаа бол OECD-ийн гишүүн орнуудын дундаж үзүүлэлт 183 өдөр байна.

 

ХИЧЭЭЛИЙН ЖИЛИЙН БҮТЦИЙГ ӨӨРЧЛӨХ ҮНДЭСЛЭЛ

Нийслэлд өвлийн улиралд хүүхдийн өвчлөл, ханиад томууны дэгдэлт эрс нэмэгдэх, агаар орчны бохирдол;

Нийслэлд замын хөдөлгөөний нягтрал, эцэг эх, асран хамгаалагчийн хүүхдээ сургуульд хүргэх, авах цагийн зохицуулалт;

Өвлийн улиралд өдөр богино, эрт харанхуй болдгоос үзэгдэх орчин хязгаарлагдсан нөхцөлд сургуульдаа явах, хальтиргаа, гулгаа ихсэх, зам, тээврийн осол гэмтэлд өртөх эрсдэл нэмэгдэх;

Өргөн уудам нутаг дэвсгэрт суурьшиж, мал аж ахуй, хөдөө аж ахуй нь өрхийн орлогын гол эх үүсвэр болдог манай орны хувьд мал төллөх үеийг хугацааг тооцох.

Бие даалт болон цахим сургалтын 7 хоногтой холбоотой нэгдсэн зөвлөмж, чиглүүлгийг БЕГ, БСҮХ-ээс ерөнхий боловсролын сургуулиудад өгнө.